«ԲԱՐԻ ՁՄԵՌ ՊԱՊ» ԾՐԱԳՐԻ ՄԱՍԻՆ

Ծրագրի նկարագրությունը

«Բարի Ձմեռ Պապ» ծրագիրը բարեգործական ծրագիր է, որը հիմնադրվել է 2008 թվականին և իրականացվում է «Համաչափ Զարգացում» Համայնքային զարգացման հասարակական կազմակերպության կողմից: Այն ուղղված է Հայաստանի Հանրապետությունում բնակվող խոցելի խմբերի, հատկապես՝ հաշմանդամ, ծնողազուրկ, սահմանամերձ գյուղերում բնակվող և սոցիալական ծանր դրության մեջ գտնվող երեխաներին:

 Ծրագրի «2017-2018» փուլը նախատեսվում է իրականացնել Տավուշի մարզի սահմանամերձ Բաղանիս գյուղում:

Ծրագիրը բաղկացած է լինելու 3 մասից:

 Մաս 1.Կազմակերպվելու է Ձմեռ պապին ուղված նամակների պատրաստում սահմանամերձ գյուղերի երեխաների կողմից: Մեր կողմից նամակների ձևաթղթերն ուղարկվելու են համապատասխան գյուղեր և երեխաների կողմից լրացվելուց հետո վերադարձվելու են ծրագրի գրասենյակ:

Նամակները սկանավորվելու միջոցով տեղադրվելու են www.santaclaus.am կայքում, որում նախատեսված է նվիրատու դառնալու հնարավորություն հետևյալ կարգով.

• Մուտք գործելով կայք՝ այցելուն ընտրում է մեկ կամ մի քանի երեխաների նամակներ, սեղմելով «Դառնալ Ձմեռ պապ» կոճակը:
• Կոճակը սեղմելիս բացվում է տվյալների լրացման պատուհան, որը լրացնելով այցելուն հայտ է ներկայացնում համապատասխան նամակագրին նվիրատվություն կատարելու համար:
• Ծրագրի աշխատակիցները կապ են հաստատում հայտ ներկայացրած անձի հետ և ստանում համապատասխան նվերները, հանձնելով համապատասխան ստացական:
• Ծրագրի ձմեռ պապերի և ձյունանուշերի միջոցով նվերները փոխանցվում են հասցեատեր երեխաներին,
• երեխաների շնորհակալագրերը և նվիրատուի տվյալները (նվիրատուի համաձայնության պարագայում) հրապարակվում են կայքում յուրաքանչյուր նվիրատուի համար ստեղծվող էջում, որտեղ զետեղվում են նաև նվիրատուի նկարը, համապատասխան նամակը և նվերները հանձնելու պահին կատարված լուսանկարը և տեսահոլովակը:

 Ծրագրի այս հատվածի նպատակն է ստեղծել մշտական և կայուն կապ կարիքավոր երեխաների և այն անձանց միջև, ովքեր պատրաստ են աջակցություն ցուցաբերել այդ երեխաներին: Ծրագիրն աշխատում է այնպիսի սկզբունքով, որ յուրաքանչյուր նվիրատու հնարավորություն ունենա հավաստիանալու իր նվերը հասցեատիրոջը հասցված լինելու հարցում և ցանկության պարագայում՝ հետագայում ևս շարունակել հովանավորել այդ երեխային:

 Մաս 2.www.santaclaus.am կայքում կազմակերպվելու է «Լավագույն նամակ Ձմեռ պապին» մրցույթը: Կայքում առկա է քվեարկելու հնարավորություն տեղադրված նամակների համար: Քվեարկության արդյունքներով լավագույնը ճանաչված նամակագիրները կստանան հատուկ նվերներ:

 Մաս 3. Ծրագրի հովանավորների և նվիրատուների կողմից տրամադրված այն նվերները, որոնք հասցեագրված չեն լինի կոնկրետ երեխաների, ձմեռ պապերի այցելությունների միջոցով տրամադրվելու են ՀՀ սահմանամերձ գյուղերի մանկահասակ երեխաներին, առաջնությունը տալով հաշմանդամ, ծնողազուրկ և սոցիալական առավել ծանր խնդիրներ ունեցող երեխաներին:

Ծրագրի և կազմակերպության նախապատմությունը

 Ծրագիրն առաջին անգամ 2008 թվականի ամանորին անցկացվել է Սյունիքի մարզի Սիսիան քաղաքում և շրջակա գյուղական համայնքներում: Այն ուղղված էր հիմնականում Սյունիքի մարզի սոցիալապես անապահով և ծնողազուրկ:Ծրագրի ձմեռ պապերի ու ձյունանուշերի այցելությունների արդյունքում շուրջ 2500 երեխաներ ստացան նվերներ: Նախաձեռնությանը աջակցեցին բազմաթիվ անհատներ` այդ թվում արտասահմանցի  բարեգործ Հանս Հաուգը` ԳԴՀ‑ից, ԱՄՆ հայ համայնքի ներկայացուցիչներ, ուսանողներ, զինվորականներ և այլոք:

 Հետագա գործունեությունը առավել արդյունավետ ու կազմակերպված իրականացնելու նպատակով, նախաձեռնության անդամները հիմնեցին «Համաչափ Զարգացում» Համայնքային զարգացման հասարակական կազմակերպությունը: Կազմակերպությունը պետական գրանցում է ստացել 27.08.2009թ. (վկայական` 03Ա085978, ՀՎՀՀ`08910023, ՀՀ Արդարադատության նախարարության իրավաբանական անձանց պետական գրանցման գործակալության կենտրոնական մարմնի կողմից):

 Ծրագրի «2009-2010» փուլն իրականացվեց Վայոց Ձորի մարզում: Մարզի բոլոր քաղաքներում տեղադրվել էին փոստարկղեր, որոնց միջոցով երեխաները իրենց նամակներն էին ուղարկում «Ձմեռ պապին»: Պատրաստվել էր ձմեռ պապի ճամբար, որտեղ անցկացվեցին մրցույթներ, ելույթներ, ցուցադրություններ և շուրջ 3000 երեխաներ ստացան նվերներ ձմեռ պապի կողմից: Ծրագրի «2009-2010»  փուլի գլխավոր հովանավորն էր «Օրանժ Արմենիա» ՓԲԸ-ն: Ծրագրին հովանավորել են նաև «Կոկա-Կոլա Հելլենիկ Բոթլինգ Արմենիա» ՓԲԸ-ն, «Յունիսեֆ»‑ը, «Կասկադ» խմբի կազմակերպությունները և բազմաթիվ անհատ բարեգործներ:

 Ծրագրի «2010-2011» փուլն իրականացվեց Վայոց Ձորի և Սյունիքի մարզերում: Ծրագրի շրջանակնեում ավելի քան 7000 սոցիալապես անապահով, ծնողազուրկ, հաշմանդամ և նամակագիր երեխաներ ստացան նվերներ: Տնային և խնամքի կենտրոնների այցելություններ կազմակերպվեցին Սյունիքի մարզի գրեթե բոլոր հաշմանդամ երեխաների համար: Այս փուլի գլխավոր հովանավորն էր կրկին «ՕրանժԱրմենիա» ընկերությունը:  Հովանավորների թվում էին նաև «Կոկա-Կոլա Հելլենիկ Բոթլինգ Արմենիա» ՓԲԸ-ն, «Յունիսեֆ»‑ը, բազմաթիվ այլ կազմակերպություններ և անհատներ:

 Ծրագրի «2011-2012», «2012-2013»,  «2013-2014», «2014-2015», «2015-2016», «2016-2017», «2017-2018»փուլերն իրականացվել են Տավուշի, Վայոց Ձորի, Սյունիքի և Արցախի սահմանամերձ մի շարք գյուղերում www.santaclaus.am կայքի միջոցով, որոնց արդյունքում նվիրատվություն է իրականացվել  շուրջ 6800 երեխաների համար,ինչպես նաև իրականացվել է «Լավագույն նամակ ձմեռ պապին» մրցույթը, որի շրջանակներում լավագույնը ճանաչված նամակագիրներին տրամադրվել ենհատուկ նվերներ: Հովանավորների թվում են եղել «Կոկա-Կոլա Հելլենիկ Բոթլինգ Արմենիա» ՓԲԸ-ն, «Յունիսեֆ»‑ը, «Արմսվիսբանկ» ՓԲԸ-ն, «Էս‑Էն‑Ար‑Սի» փաստաբանական գրասենյակը, «Թրասթ Գրուպ» ՍՊԸ-ն և հարյուրավոր այլ կազմակերպություններ ու հազարավոր անհատներ:

 Հատկանշական է, որ www.santaclaus.am կայքի միջոցով իրականացվող փուլն ունի հանրային մեծ ճանաչում և վայելում է համակրանք ու վստահություն, ինչի վկայությունն է այն փաստը, որ հազարավոր մարդիկ աշխարհի բոլոր ծայրերից դառնում են նվիրատուներ և առանց մեծ ջանքեր գործադրելու նվիրատվություն են կատարում ամենահեռավոր սահմանամերձ գյուղերի երեխաներին: Համակրանքը պայմանավորված է նրանով, որ նվիրատվություն կատարելուց առաջ հնարավոր է կարդալ երեխաների նամակները, ընտրել առավել հոգեհարազատ նամակագիրներին և նվիրատվություն կատարել կոնկրետ անձանց և ոչ թե անորոշ անձանց շրջանակի: Իսկ վստահությունը բխում է այն բանից, որ նվիրատուն հնարավորություն ունի հավաստիանալու իր նվերը հասցեատիրոջը հասցված լինելու հարցում:

 Մերկարգախոսն է.

 Այսօր չկոտրենք երեխաների սրտերը և անկատար չթողնենք նրանց նվիրական երազանքները, վաղն այն կարող է թանկ արժենալ հասարակության համար: